Ağ,
üstü açıq “Kabrialet” markalı avtomobildə gələn Röya və Anar şadlıq sarayının
qarşısında bir saata yaxın qonaqların gəlməsini və salonun dolmasını
gözləyiblər. Gəlin maşınını idarə edən bəy Anar ara vermədən siqaret
çəkib. Jurnalistlərin buraxılmadığı toy mərasiminin keçirildiyi şadlıq
sarayın girişi xüsusi mühafizəçilərlə qorunub, toya gələnlərin dəvətnamələri
yoxlanılıb. Bu tapşırığı Röyanın özü verib. Şadlıq sarayının önündə olan Röyanın
pərəstişkarları onu alqışlayıblar.
Röya pərəstişkarları toy zalına
buraxmadı
Hər zaman pərəstişkarlarını çox qiymətləndirdiyini
vurğulayan Röya, toy mərasimində onları da qapı arxasında qoyub. Toyun
keçirildiyi şadlıq sarayının həyətindən tutmuş, bütün zala kimi gözəçarpan
yerlər xüsusi dekorasiyalarla bəzədilib. Şadlıq sarayının çöl qapısında isə
saysız-hesabsız süni güllər, Anar və Röya yazılan atəş-fəşanlıq
qoyulub.
Anar və Röyanın gəlin maşını kimi seçdiyi “Kabrialet”in
arxasında isə ancaq ağ qızılgüllərdən istifadə olunub. Röya toy mərasiminə
deyildiyi kimi qızılı rəngli gəlinlik paltarında deyil, ağ gəlinlik paltarında
gəlib. Başında çox uzun ağ fata olan Röyanın geyindiyi gəlinlik libası xüsusi
sifarişlə gətirilib. Gəlinlə bəy saat 19:18-də zala giriblər. Cütlüyün rəsmi
nikah mərasimi isə toydan əvvəl keçirilib və toy ərəfəsində nikah kağızı yeni
ailə başçısına, yəni Anara təqdim olunub.
Toy mərasiminə 400-ə yaxın
qonaq dəvət olunsa da, 420 nəfər iştirak edib. Restoranın operator və
fotoqraflarından istifadə etməyən Röya özü üçün xüsusi operatorlar və
fotoqraflar dəvət edib. Hətta restoranın fotoqrafları və işçiləri də toyun
düzənləndiyi salona buraxılmayıb. Toyda olan qonaqların isə hətta telefonlarını
çıxarıb gəlinlə bəyin şəklini çəkməyə imkan verilməyib. Çəkilən şəkillərin toy
bitdikdən sonra qonaqlara təqdim ediləcəyi bildirilib.
Toy mərasimində
Röya, həyat yoldaşı Anarla duet də ifa edib. Aparıcılar Kamilə Babayeva və Nəsib
Nur tərəfindən idarə olunan toy mərasimində aparıcı müğənni Abbas Bağırov olub.
Onu öz musiqiçiləri, yəni əməkdar artist Ənvər Sadıqovun rəhbərlik etdiyi musiqi
qrupu müşayiət edib. Toy mərasimində Röyanın dostları Natəvan Həbibi, Elnur Məmmədov, Elnarə Xəlilova, Zülfiyyə
Xanbabayeva, Manana, Samirə, Lalə Məmmədova, Xəyyam Nisanov, Cavanşir Məmmədov,
Firuzə İbadova, Ramal, Samir Cavadzadə, Elnur Hüseynov, Ülvi Cəfərovun rəhbərlik
etdiyi “Şeron” qrupu, Murad Dadaşov, Anar Məmmədxanlı, Kamran Həsənli, Çoşğun
Rəhimov, Baba Vəziroğlu, Vaqif Gərayzadə, Nailə Mirməmmədli, Faiq Sücəddinov,
Emin Kərimi və başqaları iştirak ediblər. Toy mərasimində plovun süfrəyə
gətirilməsi də tamam fərqli formada olub. “Min bir gecə” nağıllarını xatırladan
mərasimdə plovu kənizlər gətirib. Röyanın dəvətliləri sırasında olan xalq
artisti İlhamə Quliyeva isə toy mərasimində iştirak etməyib. Toyun ən maraqlı
məqamlarından biri isə bəyin valideynlərinin mərasimdə iştirak etməməsi olub.
Röya ilə münasibətlərinə görə valideynlərinin Anardan imtina etdikləri barədə
məlumat yayılıb.
Mərasimdə Röyanın valideynləri, bacı və qardaşları onu
tək qoymayıblar. Toy mərasiminə təşrif buyuran müğənninin dostları ona musiqi
hədiyyələrini ediblər. Bu musiqi hədiyyəsi isə müğənninin sənət dostlarının qrup
şəklində eksklüziv hazırladığı mahnı olub. Onu da deyək ki, toy mərasimində Röya
sənət dostlarının mahnı ifa etməsini istməyib. Elə toyun əvvəlində elan olunub
ki, Röya sənət dostlarının onun toyunda istirahət etməsini istəyir. Röyanın toy
mərasiminin aparıcı müğənnisi Abbas Bağırov olsa da, toy mərasimini Vaqif
Gərayzadənin rəhbərlik etdiyi “Aypara “qrupu açıb. Elnur Məmmədov isə Röya və
Anara onların böyük portretlərinin əks olunduğu rəsm əsərini hədiyyə verib. Toy
mərasiminə “Kabrialet“də gələn Röya və Anar mərasimi ağ rəngli “Cip-Lemuzin“ də
tərk ediblər. Qeyd edək ki, cütlük sentyabrın 1-də bal ayı üçün Dubaya
gedəcək.